खुब वरस पेले इक गाम मय देवा नाम नो इक किसान तो, इनी बयरी नु नाम देवी तु। इने पाय बै गुदा ता इक नु नाम रामु बीजाने नाम किसन तु। देवो आपड़े गुदने मदद थकी हर दाड़े खतर आकीने मेनत थकी काम करतो तो। ईणा इलाका मय इक कालु नाम नो पसुओ नो वेपारी रेतो तो। गाम गाम फरीने पसुओ नी सुरी करीने बजार मय विसी करतो तो। इक वगत कालु देवा नेय खतर मय काम करतो दिकी लीदो तो,ते कालु सुसवा लागो अरे वा गुदा खुब होजे हे आणने सुरी करीने विसुगा तो मने खुब पईसा मलेगा।
वणी रातर कालु देवा नेय घेर बाणे बादियो रामु नेय सुराई करी नेय लईग्यो हवार थई तो नीदर मय उटीने देवी बाणे दिकयु ते वो हेराण थईग्यी। वो रामु नजर नी आवियो ओ हामलो के आपड़े रामु नी देकातो हे। जलदि आवो इम कईने ड़ाडे करवा लागी बाणे आविने देवा नेय रामु नी देकणो ते वो सिन्ता करवा लागो। बयरी नेय आमदी बै जण पुरा गाम मय रामु रामु की हे एम कई नेय हुजवा लाग हाज तक हुजते हुजते थाकी नेय हाजे घेर आविय। देवी केवा लागी हे भगवान अमारो रामु की हे नेय कीवो हे इने वगर आमे हरते जीवगा, हे भगवान केबी थकी अमारे रामु नेय हुजी आलो। कईने रुवा लागी।
आणी तरय थुड़ाक दाड़ा नकळीग्या, रामु नेय वगर किसन बी खवानु नी खाई रयोतो नेय अम्बा अम्बा करीने दाड़े करवा लागो। इक दाड़े देवा देवी एवी रामु नी आववा वाळो हे। वो जीवतो हे के मरीग्यो वो भगवान जाणे अगर आपड़े इक बीजो गुदो लावगा तो काम थायेगा हेड़ बाजार जाईने बीजो गुदो लाव ईणी वात माते देवी बी मानी गई बेजण पाय वाळा गाम जातरय वो खुब गुदा बजार मय विसवा हारु इक वेपारी लईने विसतो तो वो पेपारी आवो भाई आवो होजे होजे गुदा लईजो कम पईस मय इम कईने बुली लगाड़ी रयोतो। अटला मय देवी नेय आपड़ो गुदो देकवा मय आवियो तवणा ओ जी वो जुवो वो आपड़ा रामु नेय हारको देकाये हे। तवणा दीवा रामु नी हारको नी रामुस हे। जरुर आपड़े गुदाने आणे वेपारीस सुटाई करी वेगा आने होजे सजा आलवी पड़े एमकरी नेय वणा गाम मय जमीदार थकी मलीने पुरी वात बताड़ी नेय जमीदार नेय लईने वणा कालु पाय आवि नेय जमीदारजी आ गुदो मारो हे। आणे वेपारीस सुटाई करीने आय विसी रयो हे।
तवणा कालु ऐ तमे कुण हो मने तमे सुर कईरया हो मु आय 30 वर थकी आय वेपार करी रयो हुं। तवणा देवा सई हे, तमे कई रयाहो आ गुदो मारो हे ते आणा गुदाने बारा मय सब जाणता वो इम कईने देवा रामु नेय आक माते बै आत थकी आक ड़ाटीने केवा लागो के आणा गुदाने जवणा नानो तो तवणा इक आक माते लागु तु अटले आ गुदो इक आक थकी काणो हे। बताड़ो आणा गुदा नेय कई आक काणी हे,आ मने बताड़ो तो मु मानुगा के आ तमारो गुदो हे तवणा कालु थडूक सुसवा वाय किदु के ड़ाबी आक तवणा देवा बुलियो के सई सुसिने बताड़ो के वाय पसतावु नी पड़े तवणा कालु नाना जमणी आक हड़बड़ी मय कयु। तवणा देवा जुवो जमीदारजी आणा गुदा नेय कोई बी आक काणी नी हे। अगर तमे जाणवु वे तो किनेक ड़ाक्टर नेय हादीने जुवाड़ी सको तवणा जमीदारजी हुरे सुर कारे थकी सुराई करी रयो हे। हेड़ थाणे तवणा कालु मने माप करो मारी मती मारीग्यी ती एवी थकी मु कारीये सुराई नी करुगा। इने वाय देवा रामु नेय लईने घेर आवियो रामु नेय देकात मय किसन बी अम्बा अम्बा करीने खुसी थकी दाड़े करवा लागो।
अकल – सुरी करवु नेय जुठू बलवु पाप हे, सजा मलिनेस रे।
