खुब वर पेले बन्दीपुर नाम नु इक गाम मय इक ठाकोर रतो तो। एना बै सुरा ता, मुटा नु नाम अजित नेय नाना नु नाम सुजित तु। वो बैजणा लड़ाई करता रेता ता। इणने बापो इक दाड़ो सुरे लड़ाई करवी गलत वात हे, अगर तमे आम लड़तारो ते बीजा तमारो भायदो लेवानो मोको मलेगा। एने वाय बी सुरा एणने बापा थकी इका बीजाने सिकायते करता रेता ता।
अणी तरय बै सुरा मुटा थया, इक दाड़े सुरने बापो बीमार थयो ते सुरने बाई आविने सुर थकी केवा लागी तमे बै जणा आम लड़ाई करता रया अटले तमारे बापो बीमार थया हे। एवे तमे जगा नेय घेर वाटवा नी वाते नके करो नेय बै जणा मलिनेरो तवणा नानो सुरो आपड़ी बाई थकी केवा लागो के बाई मुते आने पाय कारीये नी रउगा मारेते घेर नो भाग जुवे नेय बाई तमे मारे पाय रो नेय बापो ईने पाय रयेगा थुड़क दाड़े वाय सुरने बाई नेय बापो बै जण मरीग्य ते बै सुरा जगानो नेय घेर नो भाग पाड़ी आकीयो नेय बै जणा खुब दाना थईग्या ता ते खेतर मय इक इक आमदि करीने कामावा लागा अजित नेय खेतर मय इक काम वालो ओळ आकतो तो ते ओळ हिनेक सिज थकी टकरणु ते अजित नो नोकर अजित थकी केवा लागो के मालिक आय कोक हे, तवणा अजित आवीने गोर थकी जुयु ते एने इक हुनानी पीटी नो इक भाग देकणो ते अजित इने नोकर नेय केवा लागो के आजनु काम थईग्यु बीजु काम काले करगा तमे अबार घेर जाई सको तवणा सुजित आ सब जुई रयो तो ते ईने सक थयो ते ईणे बी आपड़ा नोकर नेय घेरे मुकली नेय इक रुकड़ा ताले हपाई नेय सब जुवा लागो ते अजित आणाड़े पेलाड़े जुवा लागो नेय पसे वो हुनानी पीटी काड़वा खुतरवा लागो तवणा सुजित वय आवियो नेय केवा लागो आ धन बै जणा बराबर भाग मय वाटीगा तवणा अजित केवा लागो के मारे खेतर मय मलियु हे। अटले आ धन मारु हे, तवणा सुजित जे कोई बापा नु धन हे वो सब मय मारो बी हक हे। तवणा अजित हरते हे कोई तारा खेतर मय नी नकलीयु हे हु आ धन मारुस हे।
एम करीने बै जणा लड़ावा लागा नेय आपस मय कुटावा लागा ते वो इक सपाई आवियो नेय बैजणने जुदा करीने पीटी लईने राजा पाय गयो ते, राजा नेय पुरी वात बताड़ी ते राजो केवा लागो के जे कोई गुप्त धन नकले तो वो पेले मने केवु जुवे नेय आ धन कोई बी वे वो राजकोस मय जमा करवु पड़े तमे बै जणा राज्य ना दोसी हो अटले तमने जेल मय बन्द करवा पड़ेगा। बै जणने जेल मय बन्द करावी दिदा ते जेल मय इक बीजो केदी केवा लागो के तमे बै जणा खुब मुरक हो तमारु धन आजे आणे राजे तमार थकी लई लीदु हे।
अकल – लड़ाई करवा थकी हमेसा बीजा जणा भायदो लई सकेगा अटले लड़ाई नी करवी जुवे।
