हावड़ा मय इक नवी नानी बस वालो तो,इनी बस मय बैवानु भाडु खुब कम तु अटले वणी बस मय खुब मनक बईने यातरा करत रेत। इक दाड़े बस मय कनेक्टर सलो सलो मां आसापुरा नेय काली नो पाडु बस स्टेण्ड आवो आवो कम पईस मय जो आवो आवो इम कैवा लागो थुड़ीक वार मय थुड़क मनक आवीने बस मय बय थुड़ीक वार मय बस हिड़वा लागे तो, थुड़ीक वार मय बस नो कनेक्टर आवीने टीकट लेवा लागो बलो भाई मारे मां आसापुर ते कनेक्टर बलियो हो रुपिया लावो सरे कनेक्टर बीजा पाय जाई नेय भाई तमारे मारे बस स्टेण्ड़ जावु हे।
कनेक्टर लावो दस रुपिया तवणा कनेक्टर टीकट काटतो जाये नेय बस मय खुब दानो आमदी माते नजर पड़ी ते कनेक्टर सुसवा लागे के आणा दादा पाय टीकट ना पईसा नी वहेगा एण पाय पईसा मु नी लउगा। अटला मय बस कनेक्टर वणा डुवा पाय जाईने दादा तमारे कि जावु हे। तवणा वो दादो बुलिया हु खावु हे ते खो मु कि ना कईरयो हु। किव किव मनक आवे हे भाई कनेक्टर मारे कोई कावु नी हे, तवणा डुवो अच्छा मारे हु खावु हे एम मारे कोई नी खावु हे। मने कोक खवाड़ी नेय तमे मारे सामन लेवानी कोसिस करीरया हो। उबोरे तने मु बताडुगा। तवणा कनेक्टर केवा लागो दादा मु बस नो कनेक्टर कनेक्टर हु। तवणा वो डुवु अटलु जुरनु बलवा मय हु जरुरत हे मु बेरो नी हु। अरे दादा तमारे कि जावु हे तवणा डुवो मारे मां कईने डुवो खउका खावा लागो तवणा कनेक्टर अच्छा अच्छा मु हनजीग्यो। तवणा डुवो अरे भाई पुरी वात हामळो अटला मय बस कनेक्टर वो थकि जातोरे नेय बस थुड़ेक मोरे जाये तो वो कनेक्टर नेय नीदर आवी जाय ते वो नीदर काड़वा लागे।
अटला मय मां आसापुरा थकि बस मोरे नकळ वा वय कनेक्टर नेय नीदर उड़े ते वो सुसवा लागे अरे आ बस मां आसापुरा थकी मोरे नकळी वणा दादा नेय ते आसापुरा उतरवु तु। एम करीने वो बस ना ड्रांवर पाय जाई नेय अरे भाई बस पासी मुड़ावो वणा दादा नेय आसापुरा जावु तु। ड्रांवर बुलियो अरे आसापुरा ते आय थकी 20 किलोमीटर हे। तवणा कनेक्टर अरे भाई हिड़ोने ड्रांवर हवार हवार मय दिके नी नेय हुई जाये हे। इनेवाय पासा आसापुरा मय जाईने बस कनेक्टर वणा दादा पाय जाईने अरे दादाजी आसापुरा आविग्यु हे। अरे बीटा मारे ते काली ना पाड़ा मय उतरवु हे, तवणा कनेक्टर तमेस ते किदु तु। तवणा डुवो अरे बीटा में आसापुरा केतोस तो तवणा खउका आविया ते तु हामळीया वगर मारे पाय थकी जातो रयो तवणा कनेक्टर पण तमे आसापुरा हु लेवा बुलिया तवणा डुवो अरे बीटा मु एम करीने कयुतु के आसापुरा मय खुब नारल विसवा वाला आवे हे अटले मने नारल लेवत अटले मु बुलियो तो।
अकल – कोई बी वात पुरु हमळी नेय काम करवु जुवे हे।
