इक वगत नी वात हे, जामनगर गाम मय इक पुलिस स्टेसन तु। वणा स्टेसन मय बै पुलिस वाला ता, इक मुटो स्पेक्टर तो नी बीजो पुलिस वालो स्पेक्टर नु नाम मगरुलाल तु नेय पुलिस वाला नु नाम गमरुलाल तु। वो बै जणा लालसी ता, हमेसा मनक थकी पईसा लईने दोसी नेय सुड़ी देता ता। इक दाड़ा नी वात हे, इक आमदी दोड़तो जाईने वणा पुलिस स्टेसन आवियो नेय केवा लागो साब मु बरबाद थईग्यो मु लुटाईग्यो।
तवणा गमरुलाल बुलियो अरे भाई हु थयु आम ड़ाडे किम करीरया हो तवणा वो आमदी बुलियो मारे किराणा नी दुकान मय सुराई थई हे तमे साब कोक करो नीके तो मु बरबाद थईजउगा तवणा गमरुलाल ठीक हे ठीक हे जो साहब पाय रिपोर्ट लकावो इने वाय वो आमदी स्पेक्टर मगरुलाल पाय रिपोर्ट लकावे स्पेक्टर मगरुलाल तारु हु नाम हे, तवणा वो आमदी बुलियो लको साब स्पेक्टर हा लकिरयो हु बुलो तवणा वो आमदी लको साब स्पेक्टर अरे भाई कारना बुलिरया हो लको लको तमारु नाम हु हे। तवणा वो आमदी केवा लागो मारु नाम लको हे। साब अच्छा अच्छा स्पेक्टर बुलियो टाईटल बताड़ तवणा वो आमदी बुलियो मीटाड़ो साब स्पेक्टर अरे हु मीटाडु आबार ते लकियु हे नी तवणा वो आमदी साब टाईटल हे मीटाड़ो तवणा स्पेक्टर गाम नु नाम हु हे तवणा वो आमदी सुड़ो साब
स्पेक्टर– हु आबार ते सब लकियु हे येवी हु सुड़ो तवणा वो आमदी सुड़ो मारु गाम नु नाम हे सुड़ो।
तवणा गमरुलाल पुलिस वालो स्पेक्टर मगरुलाल थकी सर आ काम किनु वेगा
स्पेक्टर – भीम नु काम वेगा।
पुलिस वालो - सर सई वात हे इने हादो आपड़े हर वगत नी तरय इने पाय पईसा लगा।
स्पेक्टर- गमरुलाल यार मने खुब बीग लागी रई हे, आपड़े खुब पईसा लीदा हे एवे सरकार खुब तेज थईग्यी हे।
पुलिस वालो - अरे सर तमे हादो नेय आपड़े पुलिस वाला हे तमे हादो जे थाये वोमारे माते सुड़ देवानु।
तवणा भीम नेय हादे थुड़ीक वार भीम आवे।
भीम – साब हु वात हे, आजे मने हरते याद करयो।
पुलिस वालो- अरे भीमा ते वणा आमदी नेय दुकान मय सुराई करी हे आ वात आमने खबर हे। तवणा भीमो हा साब सुराई करी हे, पेले परते कोक लईने सुड़ी दो।
स्पेक्टर – आमने रीसवत आलवानी वात करीयो हे, आमे इमानदार पुलिस वाला हे।
पुलिस वालो - वेसे तु कटला आलेरयो हे।
भीमो - साब हु आम मागी रया हो भीगारी परते।
पुलिस वालो - आपड़ने भीगारी कईरयो हे सर आने जेल मय नाकी दो।
भीमो - अरे अरे साब तमने कटला जुवे लईलो मु आलवा बदले तयार हु, एम करीने स्पेक्टर नेय थुड़ाक पईसा आले। तवणा वो आमदी आपड़ो फोन काड़ीने पोटु लेवा लागे ते।
पुलिस वालो- अरे लको आ हु करीरयो हे, अमारु फोटु हु लेवा लीदु हे।
लको - मु कोई दुकान वालो नी हु सीयाड़ी स्पेक्टर विक्रम सिंह हु मने तमारी सब जाणकारी पेले थकी ती पण मारे पाय कोई सबुत नी तो अटले आजे मारे पाय सबुत बी हे।
अकल – रिसवत लेवी गलत वात हे, आपड़ने मुसीबत मय नाकी दे हे।
