इक वगत निय वात हे, कासीपुर गाम मय इक जगन्नाथ नाम नो इक भिखारी आपड़ी सुरी गोरी हाते रेतो तो। गोरी नेय बाई गाम मय इक ममारी बेमारी फेलवा निय करण मरीग्यी। नेय जगन नेय सई देकाई निय देतु तु। एणी वजय थकी गाम मय एने कोई काम निय आलतु तु। आणी मजबुरी थकी गोरी हाते एने भिख मागवी पड़ती ती, पण गोरी नेय भिख मागवु सई निय लागतु तु। वो भणाई लकाई करवा निय इच्छा राकती ती। जवणा गोरी जगन नेय हाते भिख मागवा गाम मय सेटाणी नेय घेरे जाती ते वो एणने सुरो राजु नेय भणवा लकवा नुय देकी नेय खुद बदले खुब बुरु लागतु। आ वो सेटाणी देकी नेय तानु दई नेय केती हरीया बाणा मय वोस भिखारी वेगा कोक आलि नेय आय थकी काड़ गाम मय इक बी दवाखानु निय हे, अगर आण नेय बेमारी मारे सुरा राजु नेय लागी गई ते मु हु करुगा।
आ हामळी नेय बैजण वो थकी नकळीग्य, पण गोरी बुली बापा पुरु गाम वाळ आपड़े थकी सीटी किम जए हे। हु आपड़े खराब ह ते एने बापे किदु ना बैटा बुराई ते आपड़ी गरीबी नेय एण नेय सुसवा मय हे। बापा इक दाड़े मु डोक्टर बणी नेय एण नेय आक निय दवाई करुगा मु आणा गाम मु इक दवाखानु बी खुलुगा। बैटी आपड़े बदले ते बै वगत ना रुटा मलवा मुसकील हे, आ सब ते मुट मनक नेय हपन हे। अगर मु तारे बदले कोक करीसक तो। तवणा इक बयरी गोरी नेय पाय हादी नेय किदु अरे ओ गोरी अगर तु मारे बातरुम साप करी देगा, ते मु तने कोक पईसा आलुगा गोरी एनी वात मानी नेय बातरुम साप करी आकियु। पण गोरी नेय आ वात खुब खराब लागी तवणा गोरी आ फेसलो करी लीदो के वो डोक्टर बणेगा। गोरी आपड़े बापा नेय मन्दिर पाय रहिम काका नेय पाय बेवाड़ी नेय गाम मय रमक्ड वेसी नेय पईसा कमावा लागी। पसे इक दाड़ो गाम मय माड़साप रेणुका बुन थकी मली नेय गाम मय सरकारी इस्कुल मय भणवा जावा लागी एवी गोरी इस्कुल थकी आवी नेय रुज रमक्ड़ वेसी नेय पईसा कमाती नेय आपड़े बापा नेय देकभाल करती गोरी पुरी पुरी रात्तरे जागी नेय भणाई करती इस्कुल मय हमेसा असली नम्बर थकी पास थाती।
गोरी नेय मेनत नेय लगन देकी नेय गाम वाळ नेय सेटाणी सब हेराण त, नेय वो जगन नेय गोरी थकी बळवा लागत। थीरे थीरे वगत नकळीग्यो नेय गोरी मुटी थवा लागी एणी आपड़ी मेनत नेय लगन थकी इस्कुल निय भणाई पुरी करी मोरे भणवा कोलेज बदले परिक्सा पास करी आ खबर हामळी नेय गोरी नेय बाप नेय रेणुका बै जण खुब खुस थय गोरी नेय कोलेज भणवा बदले सात्रवरती मली। पण गोरी नेय आपड़े बापा नेय इकलो मीनी नेय कोलेज बदले जावु तु अटले वो उदास ती तवणा रेणुका बुन किदु के गोरी तु आयनी सन्ता नके कर मु आय सब हबाली लुगा तु कोलेज जा नेय ड़ाक्टर बणी नेय पासी आवजे। खुब दाड़े वाय बी कोई खबर निय आवी थुड़क साल वाय गाम मय बेमारी फेलणी गोरी नेय बाप नेय सेटाणी नेय सुरो नेय गाम वाळ खुब मनक बेमार पड़वा लाग नेय गाम मय इक नानुक दवाखाना मय सब मनक पड़िय रय पण खुब दाड़े तक कोई ड़ांक्टर निय आवियो सब भगवान थकी परातना करवा लाग तवणा इक नरसण सब नेय खबर आली के एवी तमने कोई सन्ता करवानी कोई जरुरत निय हे। आजे सरकारे सब थकी मुटी ड़ांक्टर नेय आय मुकली हे, नेय वो थुड़ीक वार मय आवा वाळी हे। तवणा इक कार आवी नेय उबी रई एने मय थकी इक ड़ांक्टर उतरी गाम ना सरपंस इने माळा पेरावी। जवणा ड़ांक्टर दवाखाना मय आवी ते, सब जण देकी नेय हेराण रईग्य किमके वो ड़ांक्टर गोरी ती। गोरी आपड़े बापा नेय पोगे पड़ी नेय सब गाम वाळ नेय दवाई करी गोरी नेय दवाई थकी थुड़क दाड़ मय सब सई थईग्य। गोरी आपड़े बापा नेय ओपरेसन करी नेय आंक बी होजे करी गोरी नेय मेनत नेय लगन थकी सब गाम वाळ नेय बेमारी थकी आराम मलीयो।
अकळ – गोरी नेय तरय थकी मेनत नेय लगन थकी कोक काम करीयु जाय ते एने मय आपड़ नेय कामयाबी जरुर मले।
