इक गाम मय विमला नाम निय इक बयरी आपड़े सुरा राजु नेय आपड़ी बेटाउ गोरी हाते रेती ती। विमला नेय आदमी मरीग्यो तो ते घेर निय पुरी जिमेवारी राजु माते आवी गइती।पण गाम मय राजु नेय कोई काम निय मलवा नेय करण गरीबी नेय मुसकीले बड़वा लागी ती। विमला नेय बेटाउ खुब लालसी ती, इक दाड़े गोरी आपड़े आदमी थकी केवा लागी अरे हामळो एवी आय कोई निय राकीयु हे आपड़ नेय असली मुटा सेर मय जावु जुवे तोस आपड़े दाड़ा होजे आवेगा। निय ते आपड़ नेय भुकुमरवु पड़ेगा। तवणा राजु बुलियो अरे बाई ते आय इकली हरते तवणा गोरी बोली अरे बाई नेय सन्ता नके करो जवणा तमारी नोकरी लागी जायगा तवणा तमारे बाई नेय पईसा मुकली करगा। राजु आपड़े बाई नेय इकली मेनी नेय सेर जातो रयो।
खुब मईना पुटे बी आपड़े बेटा निय कोई खबर निय आवी विमला आपडु पेट बदले भिक मागवा लागी पण भिक मय बी कोई असली पईसा निय मलता कारेक वगर खादे हुवु पड़तु विमला रुज आपड़े बेटा निय वाट जुती रेती नेय भिक मागती वमला नेय आवाज खुब होजे ती अटले वो गान गाई नेय भिक मागवा लागी जेण थकी मनक नेय थाकेलो बी जातो रेतो ते मनक एने होजे भिक आलवा लाग विमला नेय खावा पिवा निय असली वेवस्ता थाती वो रुज रेल स्टेसन माते गावा लागी। इक दाड़े विमला नेय गाती हामळी नेय इक पीक्सरे बणाववा वाळो विमला नेय पाय ग्यो। नेय केवा लागो माजी तमे खुब बड़ीया गायु हे। हु तमे मारे हाते आवो नेय इक पिक्सर मय गावा नु गो।
एम कई नेय वो आमदी विमला नेय हाते लईग्यो। वणे इक पिक्सर मय विमला नेय हाते गावानु गावाड़ीयु पसे विमला नेय खुब आका पईसा बी आलीया विमला टीवी माते गाती थकी आववा लागी एने खुब पिक्सर मय गावा मलीयु ते वो खुब अमीर थईगई इक दाड़े विमला नेय बेटाउ टीवी माते आपड़ी हाउ नेय देकी नेय हेराण थई पसे राजु थकी किदु के हड़ो आपड़े तमारे बाई नेय मलीय खुब वर थय हे अटले मली आव एम करी नेय वो आपड़ी बाई नेय मलवा गाम मय गय ते बगला नेय बारते रकवाळी वणने बारते रुकी लद विमला आपड़े सुरा नेय आवाज हामळी नेय दोड़ी नेय बारते आवी नेयसुरा नेय गळे मली नेय केवा लागी के खुब दाड़ वाय बाई नेय याद आवी हे ते तु एवी आवीयो हे। मेते तारी खुब वाट जुई हे, बाई नेय आवो प्रेम दिकी नेय गोरी नेय राजु मापी मागी। नेय मा बदले आपड़े सुर नेय खुसी थकी कोई बी मुटू निय हे। अटले विमला बै जण नेय माप करी नेय गळे लगाड़ी दिद।
अकल – मा नेय खुसी थकी दुनिया मय कोई बी निय हे अटले आपड नेय आपड़ी लालस नेय सुड़ी नेय कारीये आपड़े मा-बाप नेय इकल निय सुडव जुवे
